Aira editorial é un selo xeneralista que publica desde o 2017 obras de todos os xéneros: narrativa, poesía, ensaio, cómic, álbum ilustrado, obras infantís e xuvenís, libros de viaxes e libros ilustrados para público adulto.
As editoriais en lingua galega desempeñan un papel fundamental na preservación, desenvolvemento e difusión da cultura propia de Galicia. Máis alá da súa función comercial, son axentes culturais esenciais que contribúen de maneira activa á normalización lingüística, á creación literaria e á consolidación dun sistema literario propio. Nun contexto no que o galego comparte espazo con outras linguas de maior presenza nos medios e na industria cultural, contar con editoriais que publiquen en galego é clave para garantir que a lingua non quede confinada a espazos formais ou educativos. A través do libro, a lingua vive, evoluciona e actualízase, e os lectores poden atoparse reflectidos nela non só na escola, senón tamén na ficción, na poesía, no ensaio, na divulgación científica ou nos álbums ilustrados.
Aira editorial contribúe, polo tanto a darlles visibilidade a voces propias, tanto de autores consagrados como de novas voces emerxentes. Ese equilibrio ben se pode observar no catálogo da editorial. Ese equilibrio tamén se consegue na escolla de obras publicadas de autores galegos e tamén de autores estranxeiros. A Biblioteca Galega constrúese con voces autóctonas e tamén con traducións, que permiten achegar novos universos creativos. Nun mercado pequeno, no que as cifras de vendas adoitan ser modestas, manter unha editorial en lingua galega é tamén un acto de resistencia e compromiso. Supón apostar pola cultura como valor esencial, máis alá da rendibilidade inmediata. Cada novo libro publicado en galego é unha semente máis que se planta no campo da nosa lingua, e cada lector que escolle ler en galego contribúe a facer medrar ese cultivo colectivo.
Neste sentido, Aira conta co Club Aira, que reúne lectores interesados en manter vivo o facho da creatividade. Os membros do Club Aira son mecenas cada ano da publicación da colección ‘Clásicos Ilustrados’, que trae á Biblioteca Galega os libros máis importantes da historia da literatura en novas traducións e xunto con ilustracións de artistas de recoñecido prestixio.
En definitiva, Aira é moito máis ca unha empresa: é unha ferramenta de construción cultural, un espazo de encontro e unha voz que defende a diversidade e o dereito a contar o mundo tamén desde Galicia, na nosa lingua.
